രണ്ടു​ കോടി മോചനദ്രവ്യം ആവശ്യപ്പെട്ട്​ തട്ടിക്കൊണ്ടുപോയ പ്രമുഖ വ്യവസായിയുടെ മകനെ മരിച്ചനിലയിൽ കണ്ടെത്തി

ജബൽപുർ: മധ്യപ്രദേശിൽ രണ്ടു​ കോടി മോചനദ്രവ്യം ആവശ്യപ്പെട്ട്​ തട്ടിക്കൊണ്ടുപോയ പ്രമുഖ വ്യവസായിയുടെ മകനെ മരിച്ചനിലയിൽ കണ്ടെത്തി. മൂന്നുദിവസം മുമ്പ്​ ജബൽപുർ ജില്ലയിൽനിന്ന്​ തട്ടിക്കൊണ്ടുപോയ 13കാരനെയാണ്​​ ഞായറാഴ്​ച കൊല്ലപ്പെട്ടനിലയിൽ കണ്ടെത്തിയത്​.[www.malabarflash.com]

ബചുവ ഗ്രാമത്തിലെ ബർഗി ഡാമിലാണ്​ കഴുത്തിൽ തുണി ചുറ്റിയ നിലയിൽ മൃതദേഹം കണ്ടെത്തിയത്​. ശ്വാസംമുട്ടിച്ച്​ കൊലപ്പെടുത്തിയ ശേഷം ഡാമിൽ ഉപേക്ഷിക്കുകയായിരുന്നു എന്നാണ്​ കരുതുന്നതെന്ന്​ സിറ്റി പോലീസ്​ സൂപ്രണ്ട്​ അലോക്​ ശർമ പറഞ്ഞു.

വ്യാഴാഴ്​ച​ വീട്ടിൽനിന്ന്​ കടയിലേക്ക്​ സാധനങ്ങൾ വാങ്ങാൻ പോയ കുട്ടിയെ ധവന്ദരി ഭാഗത്തുനിന്ന്​ അജ്ഞാതർ തട്ടിക്കൊണ്ടു പോകുകയായിരുന്നു​. പിന്നീട്​ രക്ഷിതാക്കളെ വിളിച്ച്​ രണ്ടു​ കോടി രൂപ മോചനദ്രവ്യം ആവശ്യപ്പെട്ടു.

പോലീസിൽ വിവരം അറിയിച്ചതനുസരിച്ച്​ തിരച്ചിൽ നടത്തുന്നതിനിടെയാണ്​ ഡാമിൽ കുട്ടിയുടെ മൃതദേഹം കണ്ടെത്തിയത്​.