ഹൈകോടതി പറഞ്ഞിട്ടും കീഴങ്ങിയില്ല; വ്യാജ അഭിഭാഷക​ക്കെതിരെ ലുക്ക്​ഔട്ട്​ നോട്ടീസ്

ആലപ്പു​ഴ: വ്യാജ അഭിഭാഷകക്കെതിരെ പോലീസ്​ ലുക്ക്​ഔട്ട്​ നോട്ടീസ്​. ഒളിവിൽ കഴിയുന്ന ആലപ്പുഴ രാമങ്കരി നീണ്ടശ്ശേരി സെസി സേവ്യർക്കെതിരെയാണ്​ (27) ആലപ്പുഴ നോർത്ത്​ പോലീസ്​ ലുക്ക്​ഔട്ട്​ നോട്ടീസ്​ പുറപ്പെടുവിച്ചത്​.[www.malabarflash.com] 

ഈ മാസം 17ന്​ ഹൈകോടതി മുൻകൂർ ജാമ്യാപേക്ഷ തള്ളിയതിന്​ പിന്നാലെ ഉടൻ അന്വേഷണ ഉദ്യോഗസ്ഥന്​ മുന്നിൽ കീഴടങ്ങണമെന്നും അല്ലാത്തപക്ഷം പോലീസിന്​ അറസ്​റ്റ്​ ചെയ്യാമെന്നും കോടതി വ്യക്തമാക്കിയിരുന്നു.

സെസി സേവ്യറിന് നിയമബിരുദമില്ലെന്ന് കാണിച്ച്​ ആലപ്പുഴ ബാർ അസോസിയേഷന് ലഭിച്ച ഊമക്കത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ്​ ഇവർ വ്യാജ അഭിഭാഷകയാണെന്ന് കണ്ടെത്തിയത്. തിരുവനന്തപുരത്തെ അഭിഭാഷകന്റെ എൻറോൾ നമ്പർ ഉപയോഗിച്ചാണ് സെസി അസോസിയേഷനിൽ അംഗത്വമെടുത്തത്. തുടർന്ന്​ എക്​സിക്യൂട്ടിവിലേക്ക്​ മത്സരിച്ച്​ വിജയിക്കുകയും ലൈ​ബ്രറിയുടെ ചുമതല വഹിക്കുകയും ചെയ്​തു.

തട്ടിപ്പ്​ കണ്ടെത്തിയതോടെ 24 മണിക്കൂറിനകം യോഗ്യത സർട്ടിഫിക്കറ്റ്‌ ഹാജരാക്കാൻ ബാർ ​അസോസിയേഷൻ നോട്ടീസ്‌ നൽകി. തുടർന്നാണ്​ പോലീസിൽ പരാതി നൽകിയത്​. നോർത്ത്​ പോലീസ്​ കേസെടുത്തതിന്​ പിന്നാലെ ഒളിവിൽ പോയി. ഇതിനിടെ, ആലപ്പുഴ ഫസ്​റ്റ്​ ക്ലാസ്​ മജിസ​്​ട്രേറ്റ്​ കോടതിയിൽ കീഴടങ്ങാനെത്തിയ സെസി ജാമ്യമില്ലാ വകുപ്പുകൾ ചുമത്തിയതറിഞ്ഞ്​ നാടകീയമായി മുങ്ങി. അന്ന്​ കടന്നുകളയാൻ ​അഭിഭാഷകരടക്കമുള്ളവരുടെ സഹായവും കിട്ടിയിരുന്നു.

പ്രതിയെക്കുറിച്ച വിവരം ലഭിക്കുന്നവർ സമീപത്തെ പോലീസ്​ ​സ്​റ്റേഷനിലും ഫോൺ നമ്പറുകളിലും അറിയിക്കമെന്ന ലുക്ക്​ഔട്ട്​ നോട്ടീസിൽ ചിത്രവും ഉൾ​പ്പെടുത്തിയിട്ടുണ്ട്​. ആലപ്പുഴ ഡിവൈ.എസ്​.പി ആലപ്പുഴ: 9497990041, ആലപ്പുഴ നോർത്ത്​ സി.ഐ-9497987058, എസ്​.ഐ-9497980298, സ്​റ്റേഷൻ-0477 2245541​.