ഒന്നരമാസം മുമ്പ്​ കാണാതായ ഒരു കുടുംബത്തിലെ അഞ്ചുപേരുടെ മൃതദേഹങ്ങൾ നഗ്​നമാക്കി കുഴിച്ചിട്ട നിലയിൽ

ദീവാസ്​ (മധ്യപ്രദേശ്​): ഒന്നരമാസം മുമ്പ്​ കാണാതായ ഒരു കുടുംബത്തിലെ അഞ്ചുപേരുടെ മൃതദേഹങ്ങൾ എട്ടടി താഴ്​ചയിൽ കുഴിച്ചിട്ടതായി കണ്ടെത്തി. എല്ലാവരുടെയും മൃതദേഹം നഗ്​നമാക്കപ്പെട്ട നിലയിലും വേറെ വേറെ കുഴിമാടങ്ങളിലുമായിരുന്നു. മംമ്​ത (45), മക്കളായ രൂപാലി (21), ദിവ്യ (14), ഇവരുടെ അർധ സഹോദരികളായ രണ്ട്​ പെൺകുട്ടികൾ എന്നിവരാണ്​ കൊല്ലപ്പെട്ടത്​.[www.malabarflash.com]

ഇവരെ കഴിഞ്ഞമാസം 13നാണ്​ കാണാതായത്​. തുടർന്ന്​ ബന്ധുക്കൾ നൽകിയ പരാതിയുടെ അടിസ്​ഥാനത്തിൽ നടന്ന അന്വേഷണത്തിൽ ഇവർ താമസിക്കുന്ന കെട്ടിടത്തിന്‍റെ ഉടമസ്​ഥനായ സുരേന്ദ്ര രാജ്​പുത്​ പിടിയിലായി. കൊലപാതകത്തിനും മൃതദേഹങ്ങൾ കുഴിച്ചിടുന്നതിനും സഹായിച്ച അഞ്ചുപേർ കൂടി ഇയാൾക്കൊപ്പം അറസ്റ്റിലായിട്ടുണ്ട്​. സംഘത്തിലുണ്ടായിരുന്ന ഏഴ്​ ​പേർ കൂടി പിടിയിലാകാനു​​ണ്ടെന്ന്​ പോലീസ്​ പറഞ്ഞു. ഇവർക്കായി തെരച്ചിൽ ഊർജിതമാക്കിയിട്ടുണ്ട്​.

സുരേന്ദ്രയും കൊല്ലപ്പെട്ട രൂപാലിയും തമ്മിലുള്ള ബന്ധമാണ്​ കൂട്ടക്കൊലപാതകത്തിൽ കലാ​ശിച്ചതെന്ന്​ പോലീസ്​ പറയുന്നു. പിന്നീട്​ സുരേന്ദ്ര മറ്റൊരു യുവതിയെ വിവാഹം കഴിക്കാൻ തീരുമാനിച്ചു. ഇതിന്​ പ്രതികാരമായി സുരേന്ദ്ര വിവാഹം കഴിക്കാനിരുന്ന കുട്ടിയുടെ ഫോ​ട്ടോയും ഫോൺനമ്പരും രൂപാലി സമൂഹ മാധ്യമങ്ങളിൽ പോസ്റ്റ്​ ചെയ്​തു. ഇതിൽ കുപിതനായാണ്​ സുരേന്ദ്ര രൂപാലിയെ കൊല്ലാൻ തീരുമാനിച്ചത്​. 

മറ്റു കുടുംബാംഗങ്ങൾ തനിക്കെതിരായ ഗൂഢാലോചനയിൽ പ​ങ്കെടുത്തെന്ന തെറ്റിദ്ധാരണയിലാണ് അവരെ കൂടി കൊന്നത്​. കൊലപാതകത്തിന്​ ശേഷം മൃതദേഹങ്ങളിൽ നിന്ന്​ വസ്​ത്രങ്ങൾ മാറ്റി കത്തിച്ചുകളഞ്ഞു. എട്ടടി താഴ്​ചയിൽ കുഴിച്ചിട്ട മൃതദേഹങ്ങൾ വേഗം അഴുകുന്നതിന്​ ​വേണ്ടി അവയ്​ക്കുമേൽ ഉപ്പും യൂറിയയും വിതറുകയും ചെയ്​തു.