NEWS UPDATE

6/recent/ticker-posts

ഫേസ്​ബുക്കിലൂടെ പ്രവാചക നിന്ദയെന്ന്; ബംഗളൂരുവില്‍ സംഘര്‍ഷം; എംഎല്‍എയുടെ വീടിനു നേരെ ആക്രമണം

ബംഗളൂരു: ഫേസ്​ബുക്കിൽ പ്രവാചകനെ നിന്ദിക്കുന്ന രൂപത്തിൽ പോസ്​റ്റിട്ടതിന്റെ പേരിൽ ബംഗളൂരുവിൽ ജനം തെരുവിലിറങ്ങി. അക്രമത്തിൽ നിരവധി വാഹനങ്ങൾ കത്തിച്ചു. രാത്രി പത്തോടെ ഡി.ജെ. ഹള്ളി കാവൽ ബൈരസാന്ദ്രയിലാണ്​ സംഭവം.[www.malabarflash.com]

പുലികേശി നഗറിലെ കോൺഗ്രസ്​ എം.എൽ.എ അഖണ്ഡ ശ്രീനിവാസ മൂർത്തിയുടെ സഹോദരിയുടെ മകൻ നവീനാണ്​ ഫേസ്​ബുക്കിൽ പ്രവാചകൻ മുഹമ്മദ്​ നബിയെ അവഹേളിക്കുന്ന പോസ്​റ്റിട്ടത്​. നവീനെ അറസ്​റ്റ്​ ചെയ്യണമെന്നാവശ്യപ്പെട്ട്​ തെരുവിലിറങ്ങിയ ആളുകൾ നവീന്റെ  കാറടക്കം നിരവധി വാഹനങ്ങൾ കത്തിച്ചു. 

എം.എൽ.എയുടെ വീടിനുനേരെയും കല്ലേറുണ്ടായി. കല്ലേറിൽ വീടിന്റെ ജനൽ ചില്ലുകളടക്കം തകർന്നു. നവീന്റെ അറസ്​റ്റ്​​ ആവശ്യപ്പെട്ട്​ ഡി.ജെ. ഹള്ളി പോലീസ്​ സ്​റ്റേഷന്​ മുന്നിലും ആളുകൾ തടിച്ചുകൂടി.

സംഭവമറിഞ്ഞ്​ പ്രദേശത്തേക്ക്​ വൻ പോലീസ്​ സന്നാഹം കുതിച്ചെത്തി. ലാത്തിവീശിയിട്ടും പിന്മാറാതിരുന്ന അക്രമികളെ പിരിച്ചുവിടാൻ രാത്രി 11 ഓടെ പോലീസ്​ ആകാശത്തേക്ക്​ വെടിവെച്ചു.

തെറ്റു ചെയ്​തവർക്കെതിരെ നിയമനടപടി സ്വീകരിക്കുമെന്നും കിംവദന്തികൾ കേട്ട്​ ആരും അക്രമത്തിനായി ഇറങ്ങിപ്പുറപ്പെടരുതെന്നും എം.എൽ.എ അഖണ്ഡ ശ്രീനിവാസ മൂർത്തി അഭ്യർഥിച്ചു. എന്നാൽ, പ്രവാചകനെ അവഹേളിക്കുന്ന പോസ്​റ്റ്​​ താൻ ഫേസ്​ബുക്കിലിട്ടിട്ടില്ലെന്നും തന്റെ  അക്കൗണ്ട്​ ഹാക്ക്​ ചെയ്യപ്പെട്ടതാണെന്നും നവീൻ പ്രതികരിച്ചു.

വിവാദ ഫേസ്​ബുക്ക്​ പോസ്​റ്റ്​ സംബന്ധിച്ച്​ അന്വേഷണം നടത്തുമെന്ന്​ ആഭ്യന്തര മന്ത്രി ബസവരാജ്​ ബൊമ്മെ പറഞ്ഞു. കൂടുതൽ പോലീസുകാരെ സംഘർഷസഥലത്ത്​ വിന്യസിച്ചിട്ടുണ്ട്​. സംഘർഷമുണ്ടാക്കലല്ല പരിഹാരമെന്നും അക്രമികൾക്കെതിരെ കർശന നടപടി സ്വീകരിക്കുമെന്നും അദ്ദേഹം മുന്നറിയിപ്പ്​ നൽകി.

Post a Comment

0 Comments