ബസ് സ്റ്റാന്‍ഡ് പരിസരത്തുനിന്ന് വൈകീട്ട് അഞ്ചരയോടെയാണ് പ്രകടനം ആരംഭിച്ചത്. പേരാമ്പ്ര സൂപ്പര്‍മാര്‍ക്കറ്റിലെ വിഷയത്തിനു പുറമേ പാണക്കാട് തങ്ങള്‍ക്കെതിരെയും മുദ്രാവാക്യം ഉയര്‍ന്നു. ഇതോടെയാണ് പ്രതിഷേധവുമായി യൂത്ത് ലീഗ് പ്രവര്‍ത്തകര്‍ രംഗത്തെത്തിയത്.
ഹലാല്‍ ബീഫ് വിവാദത്തിനു പിന്നാലെ കഴിഞ്ഞ ദിവസം പേരാമ്പ്രയില്‍ പ്രകോപനപരമായ മുദ്രാവാക്യങ്ങളുമായി ബി.ജെ.പി പ്രകടനം നടത്തിയിരുന്നു. വലിയ തോതില്‍ പ്രകോപനമുണ്ടാക്കാനുള്ള ശ്രമങ്ങള്‍ പ്രദേശത്ത് നടക്കുന്നതായുള്ള പരാതി ഉയര്‍ന്നിട്ടും പോലിസ് നടപടി സ്വീകരിച്ചില്ലെന്നായിരുന്നു പരാതി. ഇതിനെതിരേ പ്രതിഷേധവുമായി വിവിധ സംഘടനകളും രംഗത്തെത്തിയിരുന്നു.
ഇതിനു പിന്നാലെയാണ് ബുധനാഴ്ച വൈകീട്ട് വി.എച്ച്.പിയുടെ നേതൃത്വത്തില്‍ ടൗണില്‍ വിദ്വേഷ മുദ്രാവാക്യങ്ങളുമായി വീണ്ടും പ്രകടനം നടന്നത്.
പ്രകടനം മാര്‍ക്കറ്റില്‍ എത്തുമ്പോഴാണ് യൂത്ത് ലീഗ് പ്രവര്‍ത്തകര്‍ സംഘടിച്ച് തടഞ്ഞത്. ഇത്തരം പ്രകോപനപരമായ പ്രകടനങ്ങള്‍ തടയാന്‍ പോലിസ് നടപടി സ്വീകരിച്ചിട്ടില്ലെങ്കില്‍ തങ്ങള്‍ നേരിട്ടെത്തി തടയുമെന്ന് യൂത്ത് ലീഗ് മുന്നറിയിപ്പ് നല്‍കി. തുടര്‍ന്ന് പോലിസെത്തി വി.എച്ച്.പി മാര്‍ച്ച് തടയുകയായിരുന്നു.
0 Comments