കോടിയേരി ഒണിയൻ ഗവൺമെന്റ് ഹൈസ്കൂളിൽ ഒമ്പതാം ക്ലാസിൽ പഠിക്കുമ്പോൾ തന്നെ ബാലകൃഷ്ണനിലെ നേതൃശേഷി പാർട്ടി തിരിച്ചറിഞ്ഞിരുന്നു. അന്ന് പാർട്ടിയുടെ വിദ്യാർഥി വിഭാഗമായ കെ.എസ്.എഫിന്റെ (ഇന്നത്തെ എസ്.എഫ്.ഐയുടെ മുൻഗാമി) യൂണിറ്റ് സ്കൂളിൽ ആരംഭിച്ചപ്പോൾ ബാലകൃഷ്ണനെ പ്രഥമ സെക്രട്ടറിയാക്കിയതും അതുകൊണ്ടുതന്നെ.[www.malabarflash.com]
തലശ്ശേരിക്കടുത്ത കോടിയേരിയിൽ സ്കൂൾ അധ്യാപകനായിരുന്ന പരേതനായ കുഞ്ഞുണ്ണിക്കുറുപ്പിന്റെയും നാരായണിയമ്മയുടെയും മകനായി 1953 നവംബർ 16നാണ് കോടിയേരി ബാലകൃഷ്ണന്റെ ജനനം. ഹൈസ്കൂൾ വിദ്യാഭ്യാസത്തിനുശേഷം മാഹി മഹാത്മാഗാന്ധി കോളേജിൽ പ്രീഡിഗ്രിക്കു ചേർന്നു. 1970ൽ കോളജ് യൂനിയൻ ചെയർമാനായി. ഇക്കാലത്ത് തന്നെ സി.പി.എം ഈങ്ങയിൽപ്പീടിക ബ്രാഞ്ച് സെക്രട്ടറിയായി. കെ.എസ്.എഫിന്റെ നേതൃനിരയിലേക്ക് ഉയർന്ന കോടിയേരി ബാലകൃഷ്ണൻ 1970ൽ തിരുവനന്തപുരത്ത് നടന്ന എസ്.എഫ്.ഐയുടെ രൂപവത്കരണസമ്മേളനത്തിലും പങ്കെടുത്തിരുന്നു
തുടർന്ന്, തിരുവനന്തപുരം യൂനിവേഴ്സിറ്റി കോളജിൽ ഡിഗ്രിക്ക് ചേർന്നപ്പോൾ പ്രവർത്തനകേന്ദ്രം തലസ്ഥാനമായി. ഇത് രാഷ്ട്രീയ ജീവിതത്തിൽ വൻ വഴിത്തിരിവായിരുന്നു.1973ൽ എസ്.എഫ്.ഐ സംസ്ഥാന സെക്രട്ടറിയായി. ഈ കാലയളവിൽ സി.പി.എമ്മിന്റെ കോടിയേരി ലോക്കൽ സെക്രട്ടറി കൂടിയായിരുന്നു അദ്ദേഹം. 1973 മുതൽ 1979 വരെ സംസ്ഥാന സെക്രട്ടറിയും അഖിലേന്ത്യാ ജോയിന്റ് സെക്രട്ടറിയുമായി.
0 Comments