മദ്യപിക്കാൻ പണം നൽകാത്തതിന് അമ്മയെ തീകൊളുത്തി കൊന്ന മകന്​ 40 വർഷം തടവുശിക്ഷ

ചെന്നൈ: മദ്യപിക്കാൻ പണം നൽകാത്തതിന് അമ്മയെ തീകൊളുത്തി കൊന്ന മകനെ 40 വർഷത്തെ തടവുശിക്ഷക്ക്​ വിധിച്ച്​ പുതുക്കോട്ട ജില്ല സെഷൻസ്​ കോടതി ഉത്തരവിട്ടു. പുതുക്കോട്ട അന്നവാസൽ മരുതാന്തലൈ സന്തോഷ്​ (26) ആണ്​ പ്രതി. അമ്മ ലീലാവതി (55) ആണ്​ കൊല്ലപ്പെട്ടത്​.[www.malabarflash.com]

ഒരു വർഷം മുമ്പാണ്​ കേസിനാസ്പദമായ സംഭവം നടന്നത്​. മദ്യപിക്കുന്നതിന്​ പണം ചോദിച്ച്​ ശല്യപ്പെടുത്തിയപ്പോൾ നീയൊക്കെ ജീവിച്ചിരിക്കുന്നതിനെക്കാൾ നല്ലത്​ മരിക്കുന്നതാണെന്ന്​ അമ്മ പറഞ്ഞതിൽ പ്രകോപിതനായാണ്​ 'ഞാനെന്തിന്​ മരിക്കണം, നീയാണ്​ മരിക്കേണ്ടതെന്ന്'​ പറഞ്ഞ്​ പ്രതി മണ്ണെണ്ണയെടുത്ത്​ ദേഹത്ത്​ ഒഴിച്ച്​ തീകൊളുത്തുകയായിരുന്നു.

90 ശതമാനം പൊള്ളലേറ്റ്​ ആശുപത്രിയിൽ ചികിത്സയിൽ കഴിയവെയാണ്​ മരണം സംഭവിച്ചത്​. ലീലാവതിയുടെ മരണമൊഴിയനുസരിച്ചാണ്​ പൊലീസ്​ സന്തോഷിനെ അറസ്റ്റ്​ ചെയ്തത്​.

പ്രതിക്ക്​ ജീവപര്യന്തം തടവും 10,000 രൂപ പിഴയും വിധിച്ച കോടതി ശിക്ഷാ കാലയളവിൽ പ്രതിക്ക്​ യാതൊരു ഇളവുകളും നൽകേണ്ടതില്ലെന്നും 40 വർഷക്കാലം ജയിൽശിക്ഷ അനുഭവിക്കണമെന്നും ഉത്തരവിട്ടു. ചെയ്ത തെറ്റ്​ മനസ്സിലാക്കാനും പശ്ചാത്തപിക്കാനും പ്രതിയെ മൂന്നുമാസക്കാലം തനിച്ച്​ സെല്ലിലിടക്കണമെന്നും ജഡ്ജി അബ്ദുൽ ഖാദർ വിധി പ്രസ്താവത്തിൽ ഉത്തരവിട്ടു.

തുടർന്ന്​ പ്രതി സന്തോഷിനെ തിരുച്ചി സെൻട്രൽ ജയിലിലേക്ക്​ കൊണ്ടുപോയി. കേസ്​ രജിസ്റ്റർ ചെയ്ത്​ ഏഴ്​ മാസത്തിനകമാണ്​ കോടതി ശിക്ഷ വിധിച്ചത്​.