നീലേശ്വരത്ത്‌ പാളം മുറിച്ചുകടക്കവേ ട്രെയിനിടിച്ച്​ വയോധികനും രക്ഷിക്കാൻ ശ്രമിച്ച മരുമകളും മരിച്ചു

നീലേശ്വരം: പാളം മുറിച്ചുകടക്കവേ ട്രെയിനിടിച്ച്​ വയോധികനും രക്ഷിക്കാൻ ശ്രമിച്ച മകന്റെ ഭാര്യയും മരിച്ചു. നീലേശ്വരം കൊഴുന്തിലിലെ മുൻ ക്ഷേത്ര വാദ്യകലാകാരൻ മഠത്തിൽ വളപ്പിൽ ചന്ദ്രൻ മാരാർ (70), മകൻ ക്ഷേത്ര വാദ്യകലാകാരൻ വി.വി. പ്രസാദിന്റെ ഭാര്യ കെ.സി. അഞ്​ജലി (28) എന്നിവരാണ് മരിച്ചത്.[www.malabarflash.com]

ബുധനാഴ്ച ഉച്ച 12 മണിക്ക്​ കൊഴുന്തിലിൽ റെയിൽവേ പാളം മുറിച്ച് കടക്കുന്നതിനിടെയാണ്​ അപകടം. കേൾവിക്കുറവുള്ള ചന്ദ്രൻ ട്രെയിൻ വരുന്ന ശബ്​ദം കേട്ടിരുന്നില്ല. ട്രാക്കിന്റെ മറുഭാഗത്തെ പറമ്പിൽ ജോലിചെയ്​തിരുന്നവർ ബഹളംവെച്ചപ്പോൾ കൂടെയു​ണ്ടായിരുന്ന അഞ്​ജലി ഭർതൃപിതാവിനെ രക്ഷിക്കാൻ ശ്രമിക്കുകയും ഇരുവരും അപകടത്തിൽപെടുകയുമായിരുന്നു. ചന്ദ്രന്റെ മൃതദേഹം തിരിച്ചറിയാനാകാത്ത വിധത്തിലായിരുന്നു.

നീലേശ്വരം ജേസീസ് ഇംഗ്ലീഷ് വിദ്യാലയത്തിലെ മുൻ ഓഫിസ് ജീവനക്കാരിയായിരുന്നു അഞ്​ജലി. ചന്ദ്രന്റെ  സഹോദരനും ജേസീസ് വിദ്യാലയത്തിലെ ബസ് ഡ്രൈവറുമായ ഗോവിന്ദന്റെ  പിറന്നാൾ ആഘോഷച്ചടങ്ങിൽ പങ്കെടുക്കാനായി പുതുക്കൈയിലെ വീട്ടിലേക്ക് പോകുമ്പോഴാണ് അപകടം.

അഞ്​ജലിയുടെ ഭർത്താവ് പ്രസാദ് വാദ്യസംഘത്തോടൊപ്പം അസം ഗുവാഹതിയിലാണ്​.​ ഇവർ എത്തിയ ശേഷമാണ്​ മൃതദേഹങ്ങൾ സംസ്​കരിക്കുക. ചന്ദ്രന്റെ ഭാര്യ: പത്മിനി. മറ്റ് മക്കൾ: പ്രിയ, പ്രീത. പിലിക്കോ​ട്ടെ പരേതനായ തമ്പാൻ മാരാർ-രാധാമണി ദമ്പതികളുടെ മകളാണ് അഞ്​ജലി. സഹോദരി: അജ്ജലി.