രമേഷ്​ കാളിദാസിന്റെ അന്ത്യകർമ്മങ്ങൾ നസീർ വാടാനപ്പള്ളി നിർവഹിക്കും

ദുബൈ: ഉള്ളുലച്ചു കളയുന്ന കോവിഡ്​ കാലത്ത്​ മനുഷ്യനെ ചേർത്തുപിടിക്കുന്ന ഒരുപാട്​ മുഹൂർത്തങ്ങളുമുണ്ട്​. പൊരിവെയിലിൽ വെന്തുപൊള്ളി നിൽക്കുന്നവർക്ക്​ മുന്നിൽ മേഘം കുടയായി നിൽക്കുന്നത്​ പോലുള്ള കാഴ്​ചകൾ. എല്ലാം വ്യത്യസ്​തകളും ഇവിടെ മാഞ്ഞുപോകുന്നു.[www.malabarflash.com]

ദുബൈ റാഷിദ്​ ഹോസ്​പിറ്റലിൽ മരിച്ച മഹാരാഷ്​ട്ര സ്വദേശി രമേഷ്​ കാളിദാസി​ന്റെ സംസ്​കാരം എങ്ങനെ നടത്താൻ കഴിയും ​എന്നോർത്ത്​ കരച്ചിലിലായിരുന്നു ബന്ധുക്കൾ. കോവിഡ്​ ബാധിച്ചാണ്​ 77 വയസ്സുള്ള രമേഷ്​ജിയുടെ മരണം. കുടുംബാംഗങ്ങളെല്ലാം ക്വാറൻറീനിലായതിനാൽ സംസ്​കാരം നടത്തുന്നതെങ്ങിനെ എന്നറിയാതെ ഏറെ വിഷമത്തിലായിരുന്നു കുടുംബം.

ബന്ധുക്കളിൽനിന്ന്​ വിവരമറിഞ്ഞ്​ പ്രവാസി ബന്ധു വെൽഫെയർ ട്രസ്​റ്റ്​ ചെയർമാൻ കെ.വി. ഷംസുദ്ദീൻ ഇക്കാര്യം സാമൂഹിക പ്രവർത്തകൻ നസീർ വാടാനപ്പള്ളിയെ അറിയിച്ചു. ഉടനെ കുടുംബാംഗങ്ങളുമായി ബന്ധപ്പെട്ട നസീർ അവരുടെ അനുമതിയോടെ സംസ്​കാരത്തിന്റെ ഉത്തരവാദിത്വങ്ങൾ നിർവഹിക്കാമെന്ന്​ സമ്മതിക്കുകയായിരുന്നു.

ജബൽ അലി ശ്​മശാനത്തിൽ സംസ്​കാരം നിർവഹിച്ച ശേഷം മക​ന്റെ സ്​ഥാനത്തുനിന്ന്​ ചിതാഭസ്​മം ഏറ്റുവാങ്ങുവാനും നസീറിനെ ചുമതലപ്പെടുത്തിയിരിക്കുകയാണ്​.

റംസാൻ  27ാം രാവിൽ ഇത്തരമൊരു നിയോഗം വന്നുചേർന്നതിൽ പടച്ചവനെ സ്​തുതിക്കുന്നുവെന്ന്​ നസീർ പറഞ്ഞു. കോവിഡ്​ പ്രതിസന്ധി നമ്മെ ഒരുപാട്​ കാര്യങ്ങൾ പഠിപ്പിച്ചുവെച്ചും നമ്മൾ കെട്ടിയിരിക്കുന്ന എല്ലാ വേലികളും ഇല്ലാതായി മനുഷ്യ ഹൃദയങ്ങൾ കൂടുതൽ അടുക്കാൻ ഇതുവഴിയൊരുക്കുമെന്നും ഇദ്ദേഹം പ്രത്യാശിക്കുന്നു.