കാസര്കോട് അടുക്കത്ത്ബയല് ബിലാല് മസ്ജിദിനു സമീപത്തെ സി.എ മുഹമ്മദ് (56) കൊല്ലപ്പെട്ട കേസിൽ പ്രതികളായ കൂഡ്ലു ടെമ്പിള് റോഡിലെ സന്തോഷ് നായക് എന്ന ബജെ സന്തു (21), താളിപ്പടുപ്പ് അടുക്കത്ത്ബയലിലെ ശിവപ്രസാദ് കെ എന്ന ശിവന് (25), കൂഡ്ലു അയ്യപ്പനഗറിലെ അജിത്ത് കുമാര് എന്ന അജു (20), അടുക്കത്തുബയലിലെ കെ.ജി കിഷോര് കുമാര് എന്ന കിഷോര് (29) എന്നിവരെ ജില്ലാ അഡീഷണല് സെഷന്സ് കോടതി (രണ്ട്) ജഡ്ജി കെ. പ്രിയ കുറ്റക്കാരാണെന്നു കണ്ടെത്തി. വിധിപ്രഖ്യാപനം ശനിയാഴ്ച ഉച്ച കഴിഞ്ഞ് പ്രസ്താവിക്കാനായി മാറ്റി വച്ചിരുന്നു. ഇതിനിടയിലാണ് മൂന്നാം പ്രതിക്ക് പ്രായപൂര്ത്തിയായിട്ടില്ലെന്നു അഭിഭാഷകന് കോടതിയെ അറിയിച്ചത്. ഇതു പരിഗണിച്ചാണ് കേസിലെ വിധി പ്രസ്താവന 29-ാം തീയതിയിലേക്ക് മാറ്റി കോടതി ഉത്തരവായത്.
2018 ഏപ്രില്18ന് ആണ് സി.എ മുഹമ്മദ് കുത്തേറ്റ് മരിച്ചത്. ഇപ്പോഴത്തെ കാസര്കോട് അഡീഷണല് എസ്.പി. പി. ബാലകൃഷ്ണന് നായര് ആണ് കേസ് അന്വേഷിച്ച് പ്രതികളെ അറസ്റ്റ് ചെയ്തത്. അന്ന് അദ്ദേഹം വെള്ളരിക്കുണ്ട് പോലീസ് ഇന്സ്പെക്ടര് ആയിരുന്നു.
2008 ഏപ്രില് 14ന് സന്ദീപ് എന്ന യുവാവിനെ കുത്തിക്കൊലപ്പെടുത്തിയതിനു പിന്നാലെ മൂന്നു കൊലപാതകങ്ങളാണ് കാസര്കോട്ട് അരങ്ങേറിയത്. സന്ദീപ് കൊലക്കേസിലെ പ്രതികളെ കുറ്റക്കാരല്ലെന്നു കണ്ടെത്തി നേരത്തെ വെറുതെ വിട്ടിരുന്നു. സന്ദീപിനു പിന്നാലെ 2008 ഏപ്രില് 18ന് നെല്ലിക്കുന്ന്, ബങ്കരക്കുന്നിലെ മുഹമ്മദ് സിനാന് ആനബാഗിലു ദേശീയ പാതയിലെ അണ്ടര് ബ്രിഡ്ജിനു സമീപത്തു കുത്തേറ്റു മരിച്ചു. ബൈക്കു തടഞ്ഞു നിര്ത്തിയായിരുന്നു ഒരു സംഘം ആള്ക്കാര് സിനാനെ കൊലപ്പെടുത്തിയത്. ഈ കേസിലെ പ്രതികളെയും കോടതി വെറുതെ വിട്ടിരുന്നു.
സിനാന് കൊലക്കേസിനു പിന്നാലെയാണ് കാസര്കോട്ടെ പ്രമുഖ അഭിഭാഷകനായ പി. സുഹാസ് കുത്തേറ്റ് മരിച്ചത്. ഈ കേസ് തലശ്ശേരി സെഷന്സ് കോടതിയുടെ പരിഗണനയിലാണ്. കൊലപാതക പരമ്പരയിലെ അവസാനത്തെ കേസായിരുന്നു സി.എ മുഹമ്മദിന്റേത്.
വെള്ളിയാഴ്ച്ച ജുമുഅയ്ക്ക് നമസ്കാരത്തിനായി പള്ളിയിലേക്ക് പോവുന്നതിനിടെയാണ് അടുക്കത്ത്ബയല് ബിലാല് മസ്ജിദിനു സമീപത്തെ സി എ മുഹമ്മദ് ഹാജി(56)യെ ഒരുസംഘം സംഘപരിവാര് പ്രവര്ത്തകര് കുത്തിക്കൊലപ്പെടുത്തിയത്
ഈ കേസില് സ്പെഷ്യല് പ്രോസിക്യൂട്ടറായി സി.കെ ശ്രീധരന് കോടതിയില് ഹാജരായി.
0 Comments