NEWS UPDATE

6/recent/ticker-posts

പ്രവാസി വ്യവസായി ഭാസ്കർ ഷെട്ടി വധം: ഭാര്യ, മകൻ, ജ്യോത്സ്യൻ എന്നിവർക്ക്​ ജീവപര്യന്തം

ഉഡുപ്പി: പ്രവാസി വ്യവസായിയും ഉഡുപ്പിയിലെ നക്ഷത്ര ഹോട്ടൽ ഉടമയുമായിരുന്ന ഇന്ദ്രാണിയിലെ കെ. ഭാസ്കർ ഷെട്ടിയെ (52) കൊലപ്പെടുത്തിയ കേസിൽ മൂന്നു പ്രതികൾക്ക് ജീവപര്യന്തം. ഭാസ്​കർ ഷെട്ടിയുടെ ഭാര്യ രാജേശ്വരി ഷെട്ടി (51), മകൻ നവനീത് ഷെട്ടി (22), ജ്യോത്സ്യൻ നിരഞ്ജൻ ഭട്ട് (26) എന്നിവർക്കാണ് ഉഡുപ്പി ജില്ല സെഷൻസ് കോടതി ജഡ്ജ് ജെ.എൻ. സുബ്രഹ്മണ്യ ശിക്ഷ വിധിച്ചത്.[www.malabarflash.com]

ഇന്ത്യൻ ശിക്ഷാ നിയമത്തിലെ വകുപ്പ്​ 302 (കൊലപാതകം), 120 ബി (ക്രിമിനൽ ഗൂഢാലോചന) എന്നീ വകുപ്പുകൾ ചുമത്തിയാണ്​ പ്രതികൾക്കെതിരെ കേ​സെടുത്തിരുന്നത്​. ഐ .പി.സി 201 ാം വകുപ്പ്​ പ്രകാരം തെളിവ്​ നശിപ്പിച്ചതിന്​ ​നാലു വർഷത്തെ തടവും ഒപ്പം അനുഭവിക്കണം.

2016 ജൂലൈ 28നാണ് കേസിനാസ്പദ സംഭവം. സൗദി അറേബ്യയിൽ സൂപ്പർ മാർക്കറ്റ്​ ശൃംഖലയും ഉഡുപ്പിയിൽ നക്ഷത്ര ഹോട്ടലും നടത്തിയിരുന്ന ഭാസ്​കർ 2016 മേയിൽ നാട്ടിൽ തിരിച്ചെത്തിയിരുന്നു. കുടുംബ പൂജാരിയുമായി ഭാര്യ രാജേശ്വരിക്കുണ്ടായിരുന്ന ബന്ധം ഭാസ്​കർ മനസ്സിലാക്കിയതോടെ ഇയാളെ വകവരുത്താൻ ഭാര്യയും മകനും ചേർന്ന്​ പദ്ധതിയിടുകയായിരുന്നു. മകനെ കാണാനില്ലെന്ന്​ കാണിച്ച്​ ജൂലൈ 31ന്​ ഭാസ്​കറിന്റെ മാതാവ്​ ഗുലാബി മണിപ്പാൽ പോലീസിൽ പരാതി നൽകിയിരുന്നു. രാജേശ്വരിയും നവനീതുമാണ്​ മകന്റെ തിരോധാനത്തിന്​ പിന്നിലെന്ന്​ സംശയിക്കുന്നാതായും അവർ പരാതിയിൽ ആരോപിച്ചിരുന്നു.

ജൂലൈ 28ന്​ ഉഡുപ്പി ഇന്ദ്രാണി ഹയഗ്രീവ നഗറിലെ വീട്ടിൽവെച്ച്​ ഭാര്യയും മകനും ചേർന്ന് ഭാസ്​കർ ഷെട്ടിയെ കൊലപ്പെടുത്തുകയായിരുന്നു. തുടർന്ന്​ കഷണങ്ങളാക്കിയ മൃതദേഹം പൊതിഞ്ഞ്​ കാറിൽ കയറ്റി ജ്യോത്സ്യന്റെ സഹായത്തോടെ കർക്കല നന്ദളികെയിലെ യാഗശാലയിലെ ഹോമകുണ്ഠത്തിൽ ദഹിപ്പിച്ച് ഭസ്മമാക്കി പുഴയിൽ പല ഭാഗങ്ങളിൽ ഒഴുക്കുകയായിരുന്നു. 

കേസ്​ അന്വേഷിച്ച മണിപ്പാൽ പോലീസ്​ പ്രതികളെ പിടികൂടിയെങ്കിലും തുടരന്വേഷണം ആഗസ്​റ്റ്​ 18ന്​ സി.ഐ .ഡി വിഭാഗം ഏറ്റെടുത്തു. സൗദിയിൽ ഏഴ്​ സൂപ്പർമാർക്കറ്റും ഉഡുപ്പിയിൽ ദുർഗ ഇൻറർനാഷനൽ എന്ന നക്ഷത്ര ഹോട്ടലിനും പുറമെ ഉഡുപ്പി ഭാഗത്ത്​ നിരവധി സ്വത്തുക്കളും ഭാസ്​കർ ഷെട്ടിക്ക്​ സ്വന്തമായുണ്ടായിരുന്നു.

​പ്രൊസിക്യൂഷനുവേണ്ടി അഡ്വ. ശാന്താറാം ഷെട്ടി ഹാജരായി. സാക്ഷികളില്ലാതിരുന്ന കേസിൽ സാഹചര്യത്തെളിവുകളുടെ അടിസ്​ഥാനത്തിലായിരുന്നു കോടതിയിലെ വിചാരണ​. അന്തിമവിചാരണ വേളയിൽ രാജേശ്വരി, ഡ്രൈവർ രാഘവേന്ദ്ര എന്നിവർ​ നേരിട്ടും നവനീത്​, നിരഞ്​ജൻ എന്നിവരെ ബംഗളൂരു ജയിലിൽനിന്ന്​ വിഡിയോ കോൺഫറൻസിങ്​ വഴിയും കോടതിയിൽ ഹാജരാക്കി. 

രാജേശ്വരിയെ ബംഗളൂരു സെൻറർ ജയിലിൽ അയക്കാൻ കോടതി നിർദേശിച്ചു. മതിയായ തെളിവുകളില്ലാത്തതിനാൽ രാഘവേന്ദ്രയെ കുറ്റവിമുക്തനാക്കി. തെളിവുകൾ നശിപ്പിച്ചു എന്ന കുറ്റത്തിന് പ്രതിചേർക്കപ്പെട്ട നിരഞ്ജൻ ഭട്ടിന്റെ പിതാവ് ശ്രീനിവാസ് ഭട്ട് കേസിന്റെ വിചാരണവേളയിൽ മരണപ്പെട്ടിരുന്നു.

Post a Comment

0 Comments