അതിജീവനം കാസർകോട്​ മോഡൽ; ഞായറാഴ്​ച​ ​​രോഗമുക്തി നേടിയത്​ 26 പേർ

കാസർകോട്​: ജില്ലയില്‍ കോവിഡ്-19 നിയന്ത്രണത്തില്‍ ഞായറാഴ്​ച അതിജീവനത്തി​​ന്റെ ദിനം. കാസര്‍കോട് ജനറല്‍ ആശുപത്രിയില്‍ കോവിഡ് സ്ഥിരീകരിച്ച് ചികിത്സയിലുണ്ടായിരുന്ന 26 പേരാണ്​ രോഗം ഭേദമായി ആശുപത്രി വിട്ടത്​. രാജ്യത്തുതന്നെ ഒരു ആശുപത്രിയില്‍നിന്ന്​ ഇത്രയധികം പേര്‍ രോഗമുക്തി നേടുന്നത് ഇതാദ്യമാണ്.[www.malabarflash.com]

ഡിസ്ചാര്‍ജ് ചെയ്യുന്നതിന് മെഡിക്കല്‍ ബോര്‍ഡ് അനുമതി നല്‍കിയതിനെ തുടർന്നാണിതെന്ന്​ ഡി.എം.ഒ (ആരോഗ്യം) ഡോ. എ.വി. രാംദാസ് അറിയിച്ചു. ഇതുവരെ ജില്ലയില്‍ കോവിഡ് സ്ഥിരീകരിച്ച 166 പേരില്‍ 61 പേരാണ്​ രോഗമുക്തി നേടിയത്​. 

37 ശതമാനമാണ് അസുഖം ഭേദമായതി​​ന്റെ നിരക്ക്​. അമേരിക്കയില്‍ ഇത് 5.7 ശതമാനവും ഇന്ത്യയില്‍ 11.4 ശതമാനവുമാണ്. രോഗം ബാധിച്ചവരില്‍ ആരും മരണപ്പെട്ടിട്ടില്ലെന്നതും ശ്രദ്ധേയം. ഈ നേട്ടം കൈവരിക്കാന്‍ സഹായിച്ച സ്‌പെഷല്‍ ഓഫിസര്‍, ജില്ല ഭരണകൂടം, പോലീസ്, ഡോക്ടര്‍മാര്‍, നഴ്‌സുമാര്‍, മറ്റ് ആരോഗ്യ പ്രവര്‍ത്തകര്‍, നിർദേശമനുസരിച്ച പൊതുജനം എന്നിവരോടെല്ലാം ഡി.എം.ഒ നന്ദി പറഞ്ഞു.